ودنا قاضى كبير وعقده ومرير وكبر وعباه
قالو الميعاد.قريب يا ولاد والحضيض اللى يلفاه

معادنا حد الاهله والفهمان يحله معاد فلج ولا حد ينساه
كل خصم جاب كفيله واملى واستملى وادلى برشاه

مدو رزقهم على المحلى والكل عرف وقال ارع اناه
القاضى قال الكل يحتج ولايبج الهرج بج ويعطى كلامه فحواه

يوم الرزق حطو وفالحجج شطو وقالو هرج بليغ فى مغزاه
الكفلا استعدو وعلى سدورهم هدو وعلومهم شدو بالمواساه

القاضى قال يا ناس هدو ولا تستشدو هرجكو غامض ويش معناه
قالو مش انت الكبير ابو عباه قشمير وتحفض العلم برواه

ليش احنا جيناك وخلينا سواك وقعدنا قدامك محاباه
قالو انك فهمان والعلم عندك كيمان والهرج عندك محاصاه

الاول اليوم لى عندك ميعاد والعلم وكاد والصدق اللى تطلبه تلقاه
واليوم جايك يا سداد يا سواد وارعى كفيل الصف والمثنى وقص وراه

الثانى يا قاضينا انت لى طبيب ومقيود له من خشميه بسبيب يوم يثبت الهرج اللى شغاه
وان هاب يومه عصيب حصينى وطارده ذيب ويبيض لى فى كل بيت جيناه

وعلى مفارق الدروب وعلى كل حردوب بيت ابيض لى يبناه
ويدفع لى مية ناقه وغره قدامهن منساقه ومع البوش عبد يرعاه

او من قدامك ينسحب ويقول انه انغلب وانه صغيه او وجهه زى قفاه
القاضى بالسانكو لا ترطو وبالستر تغطو والكل يرضى بالى جاه

هرجكو شراشيب وكله عذاريب والطلبه دب مع ذيب وجهدكو عرفناه
اقعدو بحسابواسنتو باسهاب واتركو العتاب وتشريع الحق بالموالاه

فى مقعدنا صناديد وبالعلم نماريد وفى العطا اجاويد وكل من جانا حقنا ارضاه
اللى فعلته رديه ودروبه مسيه ونيته سيه الله يعينه على بلواه

للفاينه طالب وحبله على الغارب وكله عذارب والعيب فى مرباه
بيقوم مفلوج وبيضل هلبوج ودروبه عوج ويشوف له عم يقعد وراه

لا راعى حلال ولا مع البوش جمال ولا حتى قهوجى فى الشق تقناه
صاحب الحق نوارت الشق قدر واعفاه والله اعطاه والقاضى ارضاه

قالو انت بالحق فايز واللى تشوفه اليوم جايز من طيب فعله وممشاه
ويسلم قاضينا اللى بالعلم يقرينا وبالحق يرضينا والله يحماه

رجل رشيد وعقله سديد وباسه شديد وشوفه بعيد والله يرعاه
والله يديمك وعلى راسنا يقيمك ويستر حريمك يوم تلقاه