أوصيك يا ولدي

أوصيكو يا ابوي

هاجت شجونى وصابنى هوجـــــــــــاس *** ومــــــرج الخــــــواطــــــر تـــــونى جيـــــــــــته

صدرى ضاق وشحت على الانـــــــفاس *** وطيـــــف المنــــايا وين ما شنـــــــيت لقيتــــــــــه

راسى صدع وصار مليـــــــــان وسواس *** ســــــــراب فكـــــــر كل ما ذكـــــــرته نسيتــــــه

خطيت لك بيتين اثمــــــــن من المـــــاس *** قـــــــول من سمـــــــــــين المعـــــــانى نقيتــــــه

قول صريح ما فه تحجيـــــــم وقــــــواس *** كله نصايح من محطــــــات عمــــــرى لميـــــته

يا بوى عــــــــط بالك درب الادنـــــــاس *** وصــــــانى ابـــــوى قبلك وانا حـــــــافظ وصيته

اذهن وصاتى يا بــــــوى بحســـــــــــاس *** توب لـــــــربك فى كل فـــــــــرض صليـــــــــته

اياك يا بوى تاكل حــــــــقوق النــــــــاس *** وارحــــــم اللى مصايب الدهـــــــر طاويـــــــــته

اوصيك خلك بالهون لا تحــــــــــــــــتاس *** رزق الحـــلال يغنيك عن الحــــرام لو شهيتـــــه

وارحم اللى عليه طول الدهـــــــــــر داس *** شـــابت مغـــــاربه وليالى الفـــــــرح ناسيتـــــــه

وخلك لربعك خـــــــــــــــــــــدام ولا باس *** وسيــــــــدهم يــــوم العــــدو نفســــه طاغــــــيته

ودى اعطيك علم يكـــــون لك نبـــــــراس *** درب المــــــــراجل منت خسران لو مشيـــــــــته

الرجــــال يا بوى معـــــــادن وجنـــــــاس *** ولا تحقــــــــــر قليـــــــل الرجــــــال تامن ازيته

يا بوى مانى ردى خال وللصعيبات دواس *** ودرب المناعــــــــير يابـــــــــوى ما يـــوم خليته

شرع ديوانـــــك ولا تكـــــــون معبــــــاس *** ثلثين الكــــــرم بشـــــاشة الرجـــــــل مع محليته

هلى ورحب و قلط زادك لو بــــلا غمــاس *** القمــــــح يقرى يابس مبلـــــــــــول لو مديــــــته

خلك كريم ولعبــــــــاة العطـــــــا لبــــــاس *** مثل الطـــــــــــــاووس بين الطيور تشبهه ذريته

اعطى الامان لكل من على فراشـــــك داس *** حتــــى لو كـــــان عدوك الرجل ملك فى بيتــــه

خالق الروح هوه بس اللى ياخذ الـــــــراس *** ولا تخشــــى غيــره فى علــــــم واسيتــــــــــــه

السعد وعد ما هـو شطـــــــــاره وقيــــــاس *** والهمـــــاله فعـــــــــل ردى انت بيدك سويتــــه

الاصيل زى البن ما يطيب الا فى المحماس *** بيــــن المهـــــباش والنجر تنعــــــــرف نوعيته

لو الحظ يـــــــــوم فى دنيـــــــاك جـــــاس *** قول العمــــــر بخـــــت من الله ما شــــــريتـــــه

الحظ يا بوى شماعة ظعاف الـــــــــــــناس *** وحجــــــة قليل الحيــــــل اللى رايـه مع وليتــه

الرجل لزوم يكفخ كما طير قرنــــــــــــاس *** ويـــاخذ نصيبـــــه لو كل الطـــــرايد جافيتـــــه

خلك اديب يا بوى ولا تكــــــون حـــــواس *** دفـــى الحــــــنك فى كـل بيـــــت جيتـــــــــــــه

الشر شراره ولا تكون انت مقبـــــــــــــاس *** وكل واحد ربه بيعطيــــه على قــــدر نيتــــــــه

لا ترافق العاقب البواق سليل جســـــــــاس *** يرديـــــــــــك من قفــــــــــاك والبـــــــوق غيته

ولا تامن اللى ضبــــته ودهـــــا تـــــرباس *** اللى من لســــــــــــانه الدايــــــــه ساحبيــــــــته

واحظر اللى ضحكته كنها قالب نحـــــــاس *** وجهــــه زى قفـــــاه والشواطين عاويتـــــــــــه

وابعد عن اللى عيونه طبهـــــن عمـــــــاس *** ملهــــــــوف قشله واحقاد نفســــــــه عاميتـــــه

روز الرجال روزة الارض بالمخـــــــراس *** واختار لك صديق يكفيـــــك فه طيب نيتـــــــــه

خلك شبل قرم من ظهر عـــــــود هرمـــاس *** ولا تعيش ارنب العجـــــــــــرمه مذريتـــــــــه

اصرخ بصوتك مع الحق ولا تكون هسهاس *** ولا تضـــــل ضعيــــــف الرجــال زاريتـــــــه

ولا تاخذ اللى ابوها على الطـــبل نكـــــــاس *** بدل ما يغـــــــويها الشيطان هى مغـــــــويتــــه

ولا تعشغ مكحولة العين دور على الســـــاس *** ولا تاخـــــــذ الدايره اللى كل بـــــاب داقيتـــــه

ولا تعجبك المبهــــــــوره تغنج غنيج البساس *** بتذب زى الصـــــــارف كل تيـــــس ملاقيتــــه

خذ الاصيله اللى نسبها يزيدك نــــــومـــــاس *** ولا تــــاخذ اللى خدها لمارق الدرب محنيــــــته

وختار لولادك خال العرق دســــــــــــــــــاس *** قـــــــــــــــــول ما هو من عندى فى السنه لقيته

وما كل طير حسب لونه ريشــــــــــــه ينقاس *** البــــوم ارقــــــش وخبير لاكن سمعته مقيتــــــه

والصقر معروف بالجســـــاره وقـــــوة الباس *** وضــــربة مخـــــلابه شــــرف بالعـــــز مغنيته

خلك لدن ونشمى وفطين وشارب من كل كاس *** بتعيش العمر عمرين ويرحب بيك كل من جيته

وكون نبع مش فرع واحرص تكون ســـــــاس *** خلك فهيم وحكيم وعدل المضاليم ناصيتـــــــــه

يكفـــيك يا بـــــــوى انك عريـــــق ســــــــاس *** سليل طياب تربانى والفخــــــــــــــــــــــر بيته

اودعتك الله وعلــــــــــــيك اليـــــــــوم لا باس *** وانا دابنى حالى والعمـــــــــــــــر فى باقيــــتته

حالى الـــــــــــــيوم مثل صايم صايده نقراس *** بـــــــــراه يقلب فى علبــــــــــــــــــته والكبريه

يا بوى جيتك عطشان ديـــــــرلى طــــــــاس *** من حليب بكــــــره بكر وتكــــــون عفريــــــته

البكره اللى شوفها ينعش نشوة الــــــــــــراس *** ولو شفتهـــا تقــــــول عمــــرى تونى بديتـــــه

واختم كلامى بعوذه من الوسواس الخنـــــاس *** وبصلاه على نبينا اللى الكفـــــــار معاديــــــته

بقلمى
أبو علي بن جرمى