ودى اغازلها بدلال ذيك البنت النشميه......قول  ما فه  احتمال وحروفه بتسوى عددها

انجبتنى اخت رجال وانا وليد الجرميه...ابوها رباها على الدلال وابوى بالسعد وعدها

شالتنى  تسع شهور طوال كل شهر بلياليه....عدت لياليهن بالهلا ل وتحملت التعب وحدها

لما شافتنى العنا زال وقالت اجمل عطيه...ربي ارزقنى زين العيال او وهب للنفس سعدها

درت لى شبه الغزال والرزق عرب البريه...قالت لى غير الحلال ما ممكن ترضع ولدها

وارضعتنى علم الرجال وهى شايشه زالعبيه...وقالت باكرخلك رجال والضنا لمه سندها

وقالت الليالى سجال واياك من فعل السيه...وخلك طويل البال ونفسك على الطيب عودها

ابوك حر ومثاله قلال وروحه فدوى خويه.....وفالكرم ايديه طوال وبيوت ولاقت عمدها

 وخالك  قرم  رجال وخلك فالفعل  زيه....الرجل تزينه الافعال والحره تفخر بولدها

وعلمتنى ان الاجال مقدره وعند الله المنيه....وقالت الروح محال لن جا الموت نجحدها

وجعت وقامت فالحال ودتنى على الصحيه...وقالت بلهفه و استعجال ويا كبر جهدها

بسعل يا دكتور سعال وعنده نهجه  قويـــه....لفحه وتروح فالحال او عرضه جاته وحدها

سوت لى ريشات طوال قطاب فوق الطاقيه....ولما حوبيت احتفال وقمت افطط وهدها

ضمتنى وحبتين من كل جال بتنهيده قويه....وقالت يبلاه بجفال من شاف العيون وحسدها

قالت العقبه وانت خيال اشوفك فوق العبيه....ويجعل خطواتك طوال وللخير يا رب سددها

ويوم طهورى موال وزينت البيت بعومريه....وثوب وردانه طوال والزغارت با كثر عددها

كبرت وصرت رجال وقالت شوف لك بنيه....تكون لك ام عيال لبوه وتكون انت اسدها

راعتنى صغير ولا تزال همتها معى قويه....واليوم وانا رجال محتار كيف ودى اسعدها

بقلمى ابو على ابن جرمى