.               فرفش رغم الالم    

الحريم زي الورد ياما وصايف وشكال

شبيهات  العطر  كل  عطر  له   رواجه

فيهن.  اصيله وحره مدلله شبه الغزال

ترفه  غنوج  مسمسمه  بتشبه  العاجه

وفيهن شبه  المره مصوره بعباه وشال

مرهدنه  بجه    بتشبه  عيش  الكماجه

وكلن.  عحسب  ذوقها    ودها  الرجال

و كل  ذواقه   لها . مع   الرجال  حاجه

 فيهن   بتشوف   الرجل   صراف   مال

بنك   مركزي   قادر   يشتري  اي حاجه

و فيه  و دها رجل موظف  ميسر الحال

 و غير   الدراهم   منه  ماهي   محتاجه

وفيهن و دها  الرجل  مجسم  و تمثال

غندور بيرهج  قنديل  ومشعل  سراجه

وفيهن ودها مثقف يدوزن القيل والقال

مزوق  و مهندم و مرستك كأنه خو اجه

وفيهن ودها رجل يسند الحض لو مال

زعيم لو حظر بيسوي للمحلس لجاجه

 فيهن  ودها رجل كل حزه يقلب الذفال

راسه وده ترمدول مشان  يروق مزاجه

بقلمي ابو علي بن جرمي

 اهداء الى ربعي الترابين 

احنا الترابين منازلنا روس الصعافيج ....وحقنا ان ماجا بطيب بناخذه خاوه

اسمنا بين القبايل مثل الصقيلات المراهيج .... اللي ما سمع بصيتنا ما عرف سواتي البداوه

صقور بيدا و عيونا من العجاج مداعيج .... بنكفخ بمخاليب العز اهل الشقاوه

كواسر حتن الملاقا يوم ان القل مزاعيج ...بنطق خشم االلي على عيونه غشاوه

هراميس في مقعد الحق وما يوم قمنا مفاليج ....متاريس فصد المعاويج ولنا على الصد ظراوه

هرجنا يوم نحتج ازود من طرق الكرابيج .... بنملي ونستملي ولسانا بينقط حلاوه

سواتي العلم عندنا ومحنا من الناس الهلاببج ... بناخذ الحق وبنعطيه وعالظعيف ما بنتشاوه

احنا في المجتمع بالزبط زي ميشع النسيج ....واللي ما يشد عالميشع بيطب نوله رخاوه

الناس. بتسمي مدح. المشاهير. تسحيج .... واحنا بنسمي مدح مشاوخنا والكبار حفاوه

بقلمي ابو علي بن جرمي

 قلت  انظم   ليكو  قصيده  عبره  و تشمل كل الخطوط 

ود انضمها  دسمه و بختصار واشرح فيها وضعنا الحالي

علمي وكاد  والقول قدح.  زناد و قافي  موزن   مزبوط

قافي نظمته  بدقه  للعبره  كامل  وبيشمل  كل الامثالي

بلاوي  طاحت  علينا  و ما  سمعنا  لاهل  الزرم   صوط

باعونا  عربان  الخسه برخيص و ياريت ان  البيع بغالي

 عوق  و بوق وغل وقل وذل و العيشه  صارت  بشروط

ضيعه جوع وشح  وبرد و شرد و زادت  عثرات  الليالي

 شده و كرب و سلب و نهب و الوضع  أصبح  مظغوط

سوء حوال وشح رجال وقيل وقال تشمت فينا الانذالي

 هرج ومرج حرب وضرب والعالم بتيفرج علينا مبسوط

ضعف وشح  و قل  و قهر  و ضلم و كئنا  فالربع   الخالي

مثلث رعب  العروبه انحل و أصبح هيكل شبه المخروط

و  ذروة  سنام  المجد   انهارت  و قصتنا   سارت  تسالي

رساله كاتبها  متعني و القول مرستك و بالدم  مخطوط

للمدير للأمير والوزير للسفير وتشمل كل صحاب المعالي

على الله يدرك معناها و القصد وخلك من الفهم المغلوط

باكر ربك يفرجها ويجينا النصر بعونه من  الجال الشمالي

بقلمي ابو علي بن جرمي

 يا رب  نترجاك يا  عالمن بحوال  المساكين

برحمتك  تفتح  علينا  بواب  النصر  والخير

يا الله بغيث عجل يغدق على بلاد فلسطين

يا عالم السر الناس كلت واللي  عانوه كثير

طالبك يا رب نجده تحالفت  علينا  الشواطين

روس  وروم و اميركان و هنود  مع بني نضير

تكالبو علينا حفاة العرب اهل الغنيج الملاعين

وساندوهم عرب الرده والوضع أصبح خطير

 

خلي  المال و امطر عدس وفول ورز وطحين

خل الناس تاكل ايتام وارامل وشيوخ ومخاتير

عبيدك ضعوف ياالله وفي حماك يارب داخلين

ونرجاك ترزقنا بحولك يا رب كما  ترزق  الطير

لا تحوجنا يا رب عجزنا وشحت علينا المقادير

قفلت  بواب غيرك لاعاد غبر بابك به  نستجير

عدلها يا رب انت الواحد الاحد معدل الموازين

انت  الحكيم العدل اللي عنده لكل حال تفسير

تمت وصلو على اللي أرسله ربه رحمه للعالمين

صلاه تشفع لينا فيوم شحت فه عالعبد التدابر

بقلمي ابو علي بن جرمي

 توكل على اللي بالمرصاد لكل ضالم

الواحد اللي تحشع له عاصيات الجبال

الكريم اللي بحوال  كل المخاليق عالم

اعمل له واحتسب ولايغرك طول الامال

ربك عالم الغيب ومحصي كل المظالم

الجبار بحاسب العبد على قدر  لاعمال

الرحيم مخرج العبد من الأهوال سالم

و بيده الصحه و السقم و موزع  المال

و خلك جسور وعن فعل الجهال حالم

بتنعرف بالحكمه والحلم و طولة البال

اهل الكرم  للجنه   ورب   الكون عالم

طيبهم عالناس زايد وربك ساتر الحال

واشهد ان فنجال من بكرج رجل غانم

احسن من خروف على مناسف الانزال

 من الواجب عالعاقل للجاهل نصيحه

و الجاهل واجب يسمع كلام العقال

هرج مبطن و من الواجب توضيحه

الحرب جارت والحمل مابشيلنه جبال

و غزه بحرها بيغرف فيه السبيحه

أمواجه جباره ما بيعديها الا ابطال

الطلبه صارت قصه ماهي مليحه

التمو شلة دشر حفله وناقصها طبال

صربة همل لمعونات الغلابا لبيحه

كسبتهم طحين و فول معلب فدلال

الوقت العايب كثرو فيه الشبيحه

سوق عياره بس ناقص عليهم دلال

الله يسترنا من الوقت اللي له ريحه

ويكفينا شر الهمل وشمات الانذال

رماقي و اللي على وجهه بيزيحه

خنزير ما بيفرق ما بين حرام و حلال

قصتنا بين الخلائق صارت فضيحه

مابيدرك مغزى كلامي الا ناس قلال

يا صبحى بالله انكي تقولي لصبيحه

ولدكي بائق وموسم فسوق الرجال

بقلمي البو علي بن جرمي

 الصارم بطره ما بتعيبه ردوت  الجفير

والرجل بفعله وعن غيره ماهو منشود

سمح  الرجال في  مقامه دوم امير

والعبس في صفوفهم   تلقاه منقود

والسماحه طيبه نفس ما ودها خبير

شامه فخر بترهج  مثل وضح الذود

العرق دساس من ايش انت مستجير

و الولد لبوه و ثلثينه  لخواله  مردود

فيهم في صواب الراي عقله مستنير

له بصمه  و بين أهل  العرف  معدود 

خاوي  قرم  الرجال  اللي لربعه  سفير

و اترك  الهلف   اللي في  نفسه  حقود

 بعض الرجال  من   مصغره انواد  كبير

وبعض الرجال كبير وبينهم ما له وجود

وبعض الرجال صاقط لو بلغ رتبة وزير

وبعض الرجال دوله فلفزعه ماله حدود

خلك على العوايد جسار  وللعرب حرير

الرجل سمعه  الجثه  باكر  يأكلها  الدود

تمت الجزله وصلو على اللي ما له نضير

شفيعنا  باكر  يومنا  على  الحوض ورود

بقلمي ابو على بن جرمي

 أبدى كلامي بذكر الله تهليل وتسابيح

وامدح نبي القابوب في هواه  مفطره

واطلب الغفران الفجر قبل المصابيح

 من ذنوب كبار في  صفحتي مودره

يا رب طالبك من جد وبلسان فصيح

طلبت اللي المحتاج والأرزاق مقدره

طالبك ترزقنا  بالحلال والرزق شحيح

وتفتح علينا بواب على غيرنا مسكره

وتهدينا ونمشي على الدرب الصحيح

و. تقينا من شر ليالي بالضيق  مكدره

و تجعل طيبنا  يسري مع  هبة  الريح

وخلي سيرتنا بين أهل السير مسطره

وتجعل رفايقنا من أهل الوجه الفليح

من اهل القلوب اللي بالايمان معطره

تمت وصلو على من يستحق المديح

اللي  ذكره  بين  أهل  الذكر  مفخره

بقلمي ابو علي بن جرمي

 ازعجتني بصوتك  يا ذيب  و انته بتنيح 

 و كاد أن  حالك  ياديب  من حالي قريبه

سمعت  ونك وانت بروس ذيك المساريح

مدري انت مثلي قلقان ولا فاقدن لك ذيبه

ليتنا و انت رفايق فديار  قومن   مفاليح

ينطحو  المقبل   بالهلا  و بزود    ترحيبه

بديار  قوم  في رد النقا  قروم   و تلاتيح

القروم اللي خوالهم والعمام  مابهم  عيبه

ذعار صيتهم   بين الملا مايحتاج توظيح

لوجا طاريهم  فالمجاس له صوله عجيبه

رجال في الكرم   اجود  من  هبة  الريح

ذخر  لربعهم  تلقاهم  في الأيام  العصيبه

هذل ربعي ياذيب عندهم اركي واستريح

محشوم في ديارهم  من الخطى و العيبه

رجال على ساس دونك على الموت بطيح

غوزتهم  شمس  الضحى ما يهابو المريبه

رجال تشب النار الفجر من فبل التسبيح

لعقب التعاليل للفجر والجمر بيقدح لهيبه

حطبهم من الراتم والغضى والعروب شيح

عاذر ومثنان وعجرم وسر وقيصوم وشيبه

بواطيهم   الثريد  بتزيح الشحم عنه زيح

والدسم على اللحم بيزيد الزاد لذه وطيبه

والنجر له نقراح ينده عالمعازيب و يصبح

ودلالهم ملي والبكرج في مقعدهم له هيبه

عريبين الجد والنسل ساس والمنبت مليح

نرابينن ذراري الازد اثر قحطان ناس اديبه

تمت وصلو على ولد عدنان بلسان فصيح

صلاه تشع لنا في يوم الأهوال فه عجيبه

بقلمي ابو علي بن جرمي